30.11.08

Habelencias I: Convocar

Imos comezar unha serie de comentarios/aclaracións/addendas/"o que sexa" sobre as Habelencias d'As Crónicas de Gáidil.
Neste primeiro capítulo pasaremos a comentar a Habelencia de Convocar.
Convocar é unha Habelencia moi socorrida, e das máis útiles para o novato. Ten un poder devastador dende os niveles máis baixos, podendo facer moito dano. Isto, claro está, se só lle sacamos partido por ese lado. Convocar dá para moito máis.

O uso de Convocar é ben sinxelo: Tirada de Elaboración e de Folgos contra unha dificultade imposta polo Contacontos e, se temos éxito na Elaboración, o poder liberado dependerá do nivel que teñamos na Habelencia. Imaxinemos que Ghénzu o feiticeiro ten Convocar (Lume) +3. Se ten éxito na tirada de Elaboración poderá convocar unha laparada de lume que chegue a facer até 3d6 de dano. Letal para alguén pouco protexido.
Neste caso, o Lume pode ser substituído por Lóstregos ou mesmo Dagas, por exemplo. Si, si: Dagas. Un asasino pode ter a Habelencia Convocar (Dagas) +4, e (mesmo desarmado) fará un ataque coma se dun mago se tratase e tirará 4d6 de dano se ten éxito. Esas dagas, obviamente, son máxicas e desaparecerán inmediatamente despois de impactar.
Convocar Lume, Vento ou Auga pode ter diversos usos, non só ofensivos. Amra ten na súa actual Lenda de Gáidil un feiticeiro que sabe Convocar (Vento). Raras veces o usa para atacar, e ao que se adica é a establecer un perímetro protector contra frechas e ataques dese estilo, para cubrir aos seus compañeiros na batalla, aumentando a súa Defensa.
Pero Vento pode ser usado para empurrar dunha dorna que teña velas, ou para apagar un lume, ou mesmo para facer funcionar un muíño.
Un protagonista con Convocar (Xeo) podería non só facer dano a un inimigo, senón tamén crear unha película de xeo no chan que derrube aos inimigos: en troques de dano pode establecer a dificultade dunha tirada de Corpo ou Pinchacarneiros para non caer e ser derrubados, perdendo dados de Loita ou Arcano para poder poñernos de pé.
Do mesmo xeito, podemos falar de Ulin, o temible fomorián ao servizo de si mesmo que sabe Convocar (Escuridade) +5. Como vemos é un poder que non pode ser usado ofensivamente. Ulin utiliza esta Habelencia para non ser detectado. En troques de tirar 5d6 de dano, Ulin é quen de aumentar calquer intento de ser detectado por gardas, sentinelas ou vixías en 5d6. O mesmo ocorrería tendo Convocar (Brétema). É dicir, se na nosa tirada de agocharse sacamos un total de 13, e na de Convocar Escuridade sacamos un 15, mentres dure a Escuridade un garda deberá sacar un 29 coma mínimo para detectarnos. A non ser, claro, que ese garda saiba Convocar (Luz) e contrarreste os efectos da Escuridade.

Podería ter eu Convocar (Abellas) +4? Pois si. Obviamente non tería nada que ver coa Habelencia de Chamada, pois esas abellas convocadas só valerían para estorbar a un inimigo mancándoo e non estarían ao noso servizo como un animal Chamado. Pero poderían ser convocados, por que non?

Vemos así que Convocar ten moitos usos posibles e que, ás veces, elexir un método non ofensivo pode resultar máis completo e divertido en xeral para un feiticeiro ou para un aimirguín de Gáidil.

2 comentarios:

Pascual dijo...

Ola. Xa sei que os deseñadores vos propuxestes a tarefa de facer o sistema o máis sinxelo posible, cousa que apoio e defendo despois dunha adolescencia rolera con xogos como Rolemaster e tal.
Pero, que hai da habilidade para facer convocación con precisión?

Por exemplo, podería convocar auga nos pulmóns dos inimigos?

Ou encender unha única corda dun telar convocando unha faisca de lume?

Cousas polo estilo.

E por certo, boa idea o de este apartado do Blogue.

O Breogán de Gáidil dijo...

Graciñas, Pascual. Eu tamén defendo os xogos simples, pero sempre desmitificando a dificultade que todo o mundo lle dá a Rolemaster. Rolemaster é un xogo sinxelo si é xogado por un máster que coñeza ben as reglas. E moi divertido.

Ben, en resposta á túa pregunta, si: alguén podería usar de xeito máis preciso a Habelencia de Convocar. Un dos xeitos máis claros é aumentando a dificultade para engadir dano, tal e como explica o manual.
Para poder ser preciso hai que perder outras vantaxes. Deste xeito, podemos ser precisos se, tendo 4 dados de Arcano, usamos 3 para Elaborar e 1 para Folgos, ou mesmo os 4 para Elaborar e 0 en Folgos. Se obteño unha boa tirada, mesmo un crítico, poderei asumir que fun preciso. No caso de ter Convocar Auga +3 e obter un Crítico (é dicir, fun moi preciso) farei 6d6 de Dano.
Todo isto á parte de calquer dificultade que queira impor o Contacontos para reflectir esa precisión, claro. Por exemplo, no caso da faísca para prender un telar o Contacontos establecería unha dificultade por distancia e tamaño (por exemplo, 12). Se xa quero prender sen que se note que fun eu a dificultade podería subir a 18.
A ductibilidade do sistema dá para moito. Todo está en pensalo un pouco e buscar a maneira de reflectir a acción que queremos levar a cabo.